انا اخوان وكل المسلمين اخوان/ هشام الجخ

.

سُخطنا على إسلامكم الديمقراطي على قدر كُفرنا بديمقراطيتكم وآلياتها
فسُحقا لجميع نخبكم سلطة ومعارضة 11-03-2021
إعادة تنزيل: انا اخوان وكل المسلمين اخوان/ هشام الجخ 

هذا الرابط الأصلي للقصيدة: http://www.youtube.com/watch?v=rgg5MlSiQgw
...

انا اخوان وكل المسلمين اخوان 

فما تصنفش اسلامي علي كيفك 

حقيقتي اقوى من زيفك 

وصوباعي لوحده بكفوفك 

ولاتهزش قصاد خوفك 

ياخوف يا جبان انا اخوان 

بطيع الله فملكوته 

وبدعي يزيدني من فضله ومن قوته 

واصلي واصوم 

وجاهد نفسي واصبر عالبلاء واحمد وحمدي يدوم 

لانه الرازق الوهاب وهو مسبب الاسباب 

فليه الفضل والمنة وليه الطاعة 

فماتبصش لديني نظرة طماعة 

انا ديني لا هو سلعة ولا بضاعة 

ولا ليه سوق 


لا انا بايع ولا شاري 

ايماني هو راسمالي 

فاصحَ وفوق 

مانيش اخوان على نهجك 

فلم من الدروب همجك 

كفاية شكوك 

مش انت لوحدك الاخوان 

انا اخوان بحق الله وبالسنة وبالقرآن 

وقت الجد انا عثمان 

وقت الحرب انا حمزة 

ووقت الفصل ببقى فاروق 

انا اخوان على الرحمة وعالتقوى وحب الناس 

لكن عمري ماهتاخون باخونتك على الصندوق 

عينيكم فيها كل النور ومش شايفة 

غباوة انك تهدد ناس ماهيش خايفة 

بتهدد فمين يا حزين 

ده انا الاهة اللي طلقوني 

وجيعة وسارحة فالشارع 

ومش ممكن حتخفوني 

حتسمعني وغصب عن عنيك الجوز على دماغك هترفعني 

انا الناس اللي عاشت تحت خط الفقر 

وانا الناس اللي ماتت وملتقتش القبر 

فسيبك ماللي بيجاملك واللي بيهيص 

وركزلي واسمع كلمتي كويس 

انا الثورة اللي عملت منك الرايس 

انا اللي يادوب من سنتين 

كنا بنتحبس صحبة 

وكنا بنتجلد صحبة

 
وكنا فالميدان صحبة

بتبعد ليه وتكتب عالطريق غربة 

بتمش فالطريق الصعب وحدك ليه 

مهملني فلو صعبة عليك الشيلة شيلني 

تلاقيني معارضك آه لكني وراك 

بقدف فالسفينة معاك 

اكون ودنك اكون عينك 

اكون جوة فدراعينك 

نبني بلدنا لهوانا 

مش لهواك 

وخيرنا يبقي جوانا مش جواك 


مش انت تخدلي فالقرارات وانا امسح بايدي ..... 

ماتتلككش بالناس اللي بيعارضوك 

ماتتشتش ماتتسوحش 

بلدنا عايزة رايس وحش 

يسمع نقده بودانة 

مايتكبرش 

يكون جبار على الظالمين 

رحيم بينا ينام بينا 

ويقوم بينا 

يمشي يبص فالشارع علي الجعانين 

ويفهم ان فالشارع شباب ثايرين 

ملحقوش يبقوا كارهينك 

فماتزودش نار الكره فقلوبهم 

شباب شايف فلوس بلده مش بتخش فجيوبهم 

ماتخدعناش ببقين من بتوع حسني يا مولانا 

وريلنا كلام 

وصدي من الغني قفانا 

ماتدبحليش حمامة يتيمة على عينها 

وتقنعني انها ديك رومي 

ماتلعبش انت فالمية وتمسح ايدك المبلولة ف هدومي 

ومش كل اما توعد وعد تطلع بق 

وماتشدش فرامل اليد وتطلب مني انزل ازق 

ولما الناس تكون ثايرة ومختلفة ماتخطبليش ف اتباعك 

ولما تكون مع وزيرة ماتعبليش فـ ........ 

ولا تسمعني ولا اهلي ولا عشيرتي 

وخيرنا يبقى لبلدنا قبل ما ابص علي جيرتي 

بلدنا احواض من البركة وعمر النيل 

بلد دفيانة بالقران وبالانجيل

----------------------

مع تحيات خواطر وآراء

10-05-2013

.